Jamshedpur: Doctor-Mareezo Ko Tanavmukt Rakhane Ka Anokha Tarika, Aspataal Main Lagaya Gaya Music System

Aspataal Main Lagaya Gaya Music System


Jamshedpur : Hospital main ilaajrat mareez or unka ilaaj kar rahe doctor ke tanav ko halka karne ke liye jharkhand  ke jamshedpur ke khasmahal sthit sadar aspataal main jila ke civil surgeon ne ek anuthi pehal ki hai. badhe shaharon ki tarj par hospital ke operation theater or labor room main sangeet ke liye music system ki vyavastha ki hai.

operation ke saath-saath sangeet ki baat sunkar apko kuch atapata jaroor lag raha hoga, lekin jamshedpur main pehali baar operation theater main sangeet ke saath jatil se jatil operation doctor dwara kiya ja raha hai.

Dava Ke Saath Di Jayegi Music Therapy

music system se dheemi aavaj main Instrumental music bajate hai. operation room main duty karne vaale doctor or nurse bhi is nayi vyavastha se kaafi santusht hai. labor room incharge mahila doctor ne bataya ki ilaaj ke liye dava ke alaava touch therapy,talking therapy ke alaava music therapy bhi hai. isake jariye mareez ka man badalata hai use dard se thodi raahat milati hai. jaha tak seva dene vaalo ki baat hai to hume bhi acha lag raha hai. sangeet se hum bhi tanav mukt rehate hai.
jharkhand  main yeh pehala prayog kiya gaya hai, jise music therapy bhi keh sakte hai. jila ke sadar aspataal main lage is music system se 24 ghante dhun bajate hai. raat ke samay thodi der ke liye ise band kiya jaata hai.

Nayi Vyavastha Se Mareez, Parijan or Nursing Staff  Sabhi Khush

jila ke chikitsa padadhikari ka kehana hai ki labor room or operation theater main abhi yah system lagaya gaya hai. labor room main aane vaali mahilaye kaafi tanav main rehati hai. sangeet ki madad se unka maanasik tanav ko kam kiya ja sakta hai. isase pehale yah prayog kisi bhi sarkari sanstha main nahi kiya gaya tha. jamshedpur main pehali baar ho raha hai. civil surgeon ke is anuthi  pehal se mareez or unke parijan kaafi khush hai.
Previous
Next Post »